Festimet e hershme të ndërrimit të stinëve
Para disa ditëve ishte solstici i Dimrit, që në latinisht përkthehet si “dielli i palëvizshëm”. Kjo është për arsyen se në hemisferën veriore dielli gjendet në pikën më të ulët jugore të horizontit pikërisht me 21 Dhjetor. Në këtë moment, dielli ngelet i palëvizur dhe fillon të ngrihet në horizont mbas tre ditësh, ose të paktën kështu duket nga syri i njeriut. Diçka e tillë është vërejtur mirë nga njerëzit e lashtë sepse jeta e tyre varej tek drita dhe ngrohtësia që sillte dielli. Jo më kot për shumë njerëz në atë kohë dielli konsiderohej një zot. Besimet pagane e tregojnë qartë gëzimin e njerëzve në këtë periudhë të vitit kur dukej se jeta rifillonte nga e para. Kjo ishte një mundësi për të larguar çdo ves të keq nga vetja dhe për t’u ringjallur ose për të filluar rishtasi. Një festë e tillë simbolizohej me një sfond drite në kryqin pagan.
Festa Saturnalia në Romën e Lashtë
Në Romën e lashte, kishte një festë që quhej Saturnalia e cila fillonte me 17 Dhjetor dhe zgjaste për 7 ditë, pra deri me 24 Dhjetor. Gjatë kësaj feste gjithçka ndalonte dhe njerëzit vetëm dëfreheshin. Një praktikë e tillë zgjati deri në shekullin e 4-të të erës sonë në të cilën kohë kjo festë u zëvendësua me Krishtlindjet. Jo më kot ata që shkruajtën librat e Biblës më vonë e adoptuan këtë praktikë dhe e shpallën 25 Dhjetorin si ditëlindjen e Krishtit duke përdorur kryqin pagan me një sfond diellor dhe fytyrën e Jezusit në të, siç shikohet në foto. Sigurisht që lindja e Krishtit simbolizonte një rilindje për mbarë njerëzimin. Edhe pema e Krishtlindjeve ishte një ritual pagan që simbolizonte ripërtrirjen e gjelbërimit të pishave mbas datës 21 Dhjetor, një praktikë e cila u vazhdua si simbol i Krishtlindjeve.
Madje madje, edhe 12 apostujt e Krishtit nuk ishin gjë tjetër veçse një përshtatje e 12 shenjave të zodiakut, gjithashtu të rrjedhura nga besimet pagane, përmes të cilave dielli duhej të kalonte. Vetë kryqi pagan simbolizonte dy ekuinokset dhe dy solsticet që janë pika kyçe në rrugëtimin e diellit.
Një fushatë marketingu
E gjitha kjo flet për një fushatë masive marketingu ku autorë të ndryshëm kontribuan në 66 librat që sot njihen si Bibla për promovimin e mësimeve të Jezu Krishtit (që nuk është e faktuar që ka ekzistuar ndonjëherë), mësime të cilat u adoptuan më vonë nga Roma. Dashje pa dashje, shumë njerëz që sot festojnë Krishtlindjet nuk janë të vetëdijshëm se po festojnë një festë pagane, festa këto të cilat vetë kisha katolike është përpjekur t’i ndalojë që nga fillimet e hershme të saj. E gjitha kjo histori nuk është asgjë përvecse një mënyrë tjetër për të kontrolluar masat. Me siguri që perandori romak Konstantin do ketë kaluar një moment aha-je kur pranoi krishtërimin duke siguruar kështu një aleate të fortë në kontrollin mbi masat – kishën katolike.
“Është më e lehtë ta mashtrosh dikë sesa ta bindësh që e kanë mashtruar.” – Mark Twain